大臺南觀光詩 2018

觀光客仔誠愛來府城，規條車路窒甲袂當行，來到臺南你就斟酌看，若無棄嫌後擺相招伴，

咱臺南的天氣較燒熱，無愛曝日就愛攑涼傘，行無幾步路規身軀汗，臭汗滴流甲規尻脊骿，

短手䘼仔著加紮幾領，若是澹濕較好來替換，備好歡喜出遊的心情，咱隨時攏會使來出發，

你若是有一張悠遊卡，就有法度租借跤踏車，若是無嘛實在袂按怎，健康運動就用雙跤行，

五條港郊協進鎮海營，安海港頭發源松仔跤，大菜市前淺草大糖埕，牛磨後街神興千歲爺，

臺灣輕鐵這馬郭綜合，屎山仔後帆寮觀音媽，宮古座後蕃薯港水發，沙淘保西千歲太子爺，

提著紩針徛佇大西跤，食雞卵糕你就揣長崎，內宮後街遇到韓石泉，大井頭水啉落止喙焦，

全美戲院二輪的電影，陳德聚堂統領蹛佇遮，野戰郵局設佇溫陵媽，郵便起了才向內底搬，

民生路上向東爬鷲嶺，臺澎道署永福臺南廳，寓望園內樓閣佮亭榭，斐亭澄臺澎湃海湧聲，

鄭氏祖廟門口古井盤，對面五帝隔壁有三官，土地銀行列柱介典雅，林百貨店流籠吊縋線，

測候所邊教會佮天壇，鶯料理內官員來盤撋，大正公園往過牛屎埕，消防博物館合同廳舍，

臺文館本來臺南州廳，四海龍王委屈迫遷搬，美術館址原在警察官，全臺首學徛佇檨仔林，

武德殿參石濤相對看，美術二館是臺南神社，地方法院明鄭馬兵營，繼續行落南爿土墼埕，

昆沙宮內主祀李哪吒，對面二府衙口海防廳，頭前圓環就是小西跤，新光三越舊底臺南監，

藍晒圖對海安徙來遮，遮原本是地院舊宿舍，臺南禪寺現今已經拆，西本願寺妙經佮弘法，

電影書院往日放送聲，三百年冬寧南門月城，愛國婦人二戰鬥拚命，福康安祠贔屭九塊磐，

臺灣銀行原底拜永華，乾隆年前旁有秀峰塔，山仔尾溝臨水夫人媽，開山路頂祭拜國姓爺，

臺南女中創校今滿百，師範大學培養教育者，竹溪墘邊佛寺是法華，南湖書院琅琅讀冊聲，

山川台頂設立社稷壇，東門圓環爬去上懸崎，祝三多街彌陀欣仔社，萬利花園十八米海拔，

溝仔底溪奎樓捌搬徙，原來所在林百貨後壁，東安坊文昌祠佇邊仔，二戰受到美軍的轟炸，

縣學文廟北爿紲流濺，銀同祖廟合流後牆跤，油行尾溝濫流四角埕，水流觀音清水祖師爺，

青年路頂東市枵鬼埕，興華街口辦公經歷廳，崙仔頂西竹圍規山坪，知事官邸裕仁捌蹛遮，

德慶溪水發源水肥埕，流過一中前鋒山仔跤，水流瀳湧迵地下道外，東亞樓仔巷內太爺崎，

龍鳳坪頂開隆七娘媽，旭峯號本底賣白鐵仔，臺南病院仁心救人命，明鄭時期鎮守是右營，

公會堂內展覽介優雅，枋橋頭邊吳園賰水榭，鹽商尚新規世來拚命，去予阿本徵收厝樓拆，

圖書總館徙去綠池遐，臺南御旅四春園旅社，對面巷內懸埔番薯崎，赤崁對面萬福庵照壁，

祀典武廟祭拜關帝爺，大天后宮月老牽紅線，來石精臼食个點心擔，王宮港墘曝粟米街糴，

西門圓環原名洪厝埕，寶美樓是酒家上有名，南座臺頂踅轉大圓盤，大舞台前頂下粗糠崎，

普濟燈會元宵花燈掛，欲食好料攏總佇國華，風神廟內風火水雷電，南河港邊鎮渡頭接官，

神農老街文創好物件，北勢街南勢港貨運搬，做十六歲始得全薪領，廟內軁轎歡喜慶轉晟，

信義街口兌悅是甕城，北小廠外看南佮金瀛，媽祖樓前廚子拍電影，軍工道廠造船第一名，

立人國小桃李滿天下，三山國王祐潮州兒囝，水尾開基天后船仔媽，綴著鄭成功來臺灣遮，

廣陞樓頂觥籌賓客聲，臺灣縣署變明治公學，鴨母寮有菜市好揣食，也有臺灣縣邑城隍爺，

順成功路行落到尖山，天池底有督標佮中營，大觀音亭位在尖山跤，興濟保生大帝蹛隔壁，

到玉皇宮咱攏若狗蟻，成功路尾圓環臺南驛，勸業銀行後來變報社，東屋旅館日式烏厝瓦，

市仔頭廟口往早繁華，公園南路藏有偕行社，金幢西華堂拜佛得定，文創園區後頭看火車，

臺南公園全市區上大，大北拱辰遭受日本拆，重道崇文朝英受勉嘉，燕潭垂榕鳥鳴水墘岸，

臺南二中徛佇馬房山，文元溪水發源中樓仔，黃蘗寺址原居陳永華，成大日本時代是兵營，

衛戍病院醫護步兵官，大成館是二聯隊營舍，歷史文物館留城門額，勝利路邊猶存舊城壁，

成大校長保存舊門城，靖波門對原址徙來遮，工業學校本館猶佇遐，格致堂的風格仿羅馬，

朱公一貴春牛埔捙拚，雍正防範起著東門城，道光年間加起外廓城，永康東郭仁和總共三，

巽方砲台防衛拚輸贏，艮方舊址臨長榮中學，永康門址佇和敬光華，邊仔長老教會女中學，

州立農改場巽方邊仔，大東夜市全臺透名聲，毋但遮講景點一寡寡，猶有真濟好耍的清單，

若欲泅浴黃金海墘岸，抑是花園武聖食酒攤，安平角頭總共有六社，古堡往早號作熱蘭遮，

樹屋洋行城北排規逝，朱玖瑩居所在其中徛，小砲台佇窯尾湯匙山，安平劍獅祈福兼避邪，

海山館是水師會館舍，茉莉巷內花芳引尾蝶，運河舊海關變展覽廳，舊河入海民權路四段，

開臺天后宮全省上早，夕遊出張鹽神白沙灘，盧經堂宅買辦兼絞蔗，默娘公園風吹飛颺颺，

延平老街有食有文化，規條街路予你買免驚，北園開元柴頭港溪畔，巴克禮公園落羽松仔，

二鯤鯓砲台億載金城，漁光島三鯤鯓海沙坪，南區瀨口竹溪佇鹽埕，閣四鯤鯓這馬喜樹仔，

臺江國家公園潮間帶，四草砲台佇大眾廟埕，鹿耳門聖母廟佇土城，鹿耳門天后宮佇北汕，

鹿耳門溪口天險石磐，臺史博展示先祖拚命，新化街役場變西餐廳，武德殿的地板鋪弓仔，

大目降掠蟋蟀來相拍，猶有新化郡役所宿舍，踅虎頭埤騎著跤踏車，大坑休閒農場泡溫泉，

菁寮無米樂是佇後壁，車頭鐵道糖廠烏樹林，北門水晶教堂介鑠奅，食鹽焗卵就去錢來也，

烏跤病館金河貢獻大，瀨東鹽場井仔跤瓦盤，鹽水蜂炮請出周倉爺，月津燈節毫光照遍野，

永成戲院米間看電影，大眾廟前聚波唱漁歌，鹽水車頭往日迵新營，迷你孔廟原本是神社，

八角樓是糖郊商葉家，伏見宮貞愛親王御舍，南鯤鯓代天府槺榔山，橋南老街鹽水祖玄壇，

法鼓山雲集寺介莊嚴，佳里蕭壟金唐殿王爺，震興宮有立碑佇廟埕，明鄭北路安撫司遺跡，

東山大公廨佇吉貝耍，集會總部平埔西拉雅，都會公園奇美介高雅，十鼓仁糖食冰踅會社，

白河蓮花瓣紅荷葉大，閣有臺灣電影文化城，水火同源溫泉關仔嶺，碧雲寺夕照遐邇馳名，

林初埤木棉道紅冇冇，紅葉公園四季如春夏，新市樹谷考古刈稻仔，楠西梅嶺舊名弓蕉山，

七股遐有潟湖佮鹽山，葉王獅交趾燒佇學甲，慈濟宮存作品百迵件，頑皮世界動物規山坪，

慶安宮有一間佇善化，北白川宮有捌蹛佇遮，光文後半生攏獻予遮，教學平埔族人字怎寫，

善化市場好味攏佇遐，福興百年冰店是蘇家，一等涼冬瓜茶止喙焦，舊時牛墟位在南門外，

另外慶安宮是西港媽，十二瘟王鯉魚千歲爺，三年一香科舊曆四月，王醮刈香是南瀛七大，

麻豆代天府規模真大，天堂地獄巨龍佮王爺，總爺糖廠藝術參文化，倒風內海水堀頭港汊，

護濟宮內服祀麻豆媽，碗粿就屬阿蘭上有名，中山路頂洋樓排規逝，電姬戲院deco介典雅，

永華招墾留名叫六甲，廡殿柴造車站林鳳營，鄭軍女宿俗稱查某營，德元埤水庫嘛佇柳營，

茅港尾港雙顯佇下營，閣有鐵線橋港佇新營，大內區的農場走馬瀨，南瀛天文觀星兼山，

龍王瀑布水庫佇南化，臺灣獼猴保護佇烏山，官田菱角欲挽十月半，珊瑚水庫八田功勞大，

左鎮抾化石菜寮溪畔，噶瑪噶居藏密中土化，月世界的惡地佇草山，二寮出日看嫷兼攝影，

將軍歐汪方圓美術館，山上臺南水道給啉食，臺南好耍毋是一般般，翕相鋪網怎看嘛奢颺。

來到臺南若是欲揣食，伴手禮予你買幾若捾，錢袋著愛量早飼予飽，加薦仔嘛愛紮較大坩，

總爺街內連德堂煎餅，觀音亭對街枝仔冰城，甜在心紅豆餅滿滿餡，食阿娟就記得敨粽箬，

國華街邊永樂的燒肉，傳統口味金得的潤餅，水仙宮青草茶退火熱，阿松刈包八十年名聲，

富盛碗粿蝦仁肥飽滿，邊仔猶有亞德當歸鴨，好味紅燒土魠嘛好食，閣有修安豆花是扁擔，

若欲買餅大銃舊來發，舊永瑞珍是嘛介出名，食冰淇淋正興蜷尾家，泰成果冰落喉心脾闊，

凰商號王梨汁止喙焦，大菜市內福榮點心擔，友愛街中赤崁食棺材，小管米粉你就揣邱家，

再發肉粽好味大喙咬，炸雞洋行脆皮包幼肉，黃火木江水號來一碗，豆奶宗賣早頓佮消夜，

赤崁樓前松村賣豆干，隔壁閣有双生綠豆沙，松稜滷味落成米糕棧，義豐冬瓜退涼閣止渴，

進福塗豆糖佮烏麻仔，所長茶米卵起家新化，浮水魚羹就食白北仔，赤崁對面這馬叫呷霸，

韓金婆婆清涼透心肝，擔仔麵洪芋頭度小月，來丹丹就愛食漢肉甲，家樂的麭興食袂介差，

阿全碗粿佇咧檨仔林，克林台包六十六冬外，孔廟邊仔莉莉冰果擔，狹門咖啡文青愛來食，

萬川肉包壽桃佮糕餅，甘本堂老字號糕仔餅，芳苑冰枝一支焦十三，兩箍烏輪莿桐共日遮，

食蝦仁飯集品矮仔成，武廟肉圓皮𩚨肉彈牙，鰇魚油飯就共阿美訂，紅蟳米糕我舉荐阿霞，

西門圓環阿輝鱔魚炒，悅津鹹糜規工袂收擔，慕紅豆的湯是煮燃柴，首府米糕三官廟隔壁，

吳萬春賣李鹹檨仔乾，蜂蜜卵糕名東佮長崎，信義街咾咕石碗粿擔，俗閣大塊鄭記蔥肉餅，

十八卯柳屋古蹟活化，寮國甘單咖啡攏好食，雙全紅茶價俗止喙焦，汕頭魚麵佇開山宮外，

阿明豬心食補兼定驚，楊哥楊嫂肉粽俗閣大，紅磚布丁銀波吃麵吧，依蕾特是全臺遍蹤跡，

王氏魚皮章成麥芽餅，同記豆花安平第一名，李合興李鹹文章牛肉，周氏蝦捲百祿珍燒餅，

安平小舖油糋鮮蝦餅，林永泰興鹹酸甜來佮，講到臺南美食規大盤，予你聽著直直流喙瀾，

若是好食你就大聲喝，若無食到你會砧心肝，你有需要我會共你𤆬，暢遊台南逐家作陣行。